IV Camiñada entre as Torres

O alumnado de 1º de ESO realizou hoxe a Camiñada coa que iniciamos as actividades do proxecto interdisciplinar "O patrimonio do meu concello" no curso 2014/15

Como vén sendo habitual saímos a primeira hora da mañá desde o centro escolar para dirixirnos ate o pazo- torre de Friol e iniciar aí as actividades propostas na Camiñada. Desde alí continuamos camiño da torre de S. Paio completando as actividades nos diferentes puntos do traxecto e rematando coa localización das figas que protexen as chemineas da Torre de San Paio.

Finalizado o traballo volvemos para o centro pero esta vez en autobús.

Xa para rematar dicir que a avaliación da camiñada por parte do alumnado superou o 9 sobre 10.

Despois disto só queda poñerse a traballar no proxecto.

III Camiñada entre as Torres

Este martes, 24 de setembro, o alumnado de 1º de ESO, como actividade iniciadora do Proxecto Interdisciplinar deste curso 2013-14, realizaron a III Camiñada entre as Torres que iniciamos na Torre- pazo de Friol e rematamos na Torre de San Paio.

Despois de adiantar a actividade e escoller o día para evitar a choiva, ao pouco de saírmos caeunos unha chuvascada que ben pensamos ía impedir a actividade... pero tivemos sorte.

O camiño - por fin podemos falar de camiño- está en perfecto estado, despois dos arranxos que se fixeron este verán. A verdade é que é unha legua ben atractiva. 

Fixemos as paradas establecidas para realizar as actividades propostas e regresamos ao colexio onde fixemos a avaliación da Camiñada e se propuxeron as diferentes propostas de traballo que cada alumno debe investigar.

Estamos en marcha. 

II Camiñada das Torres

Hoxe, realizamos a II Camiñada das Torres, co programa establecido de antemán que como o curso pasado comezou na Torre de Friol para achegármonos ata San Paio e regresar á escola.Dada a seca que estamos padecendo, non houbo ningún problema coa auga, pois os dous regos que tiñamos que atravesar estaban ben secos.
Desenvolvemos as actividades previstas e quedan pendentes para as próximas sesións do Proxecto Interdisciplinar as que hai que rematar informándonos na casa para completar as fichas correspondentes.
Deixamos aquí un par de fotografías: unha do comezo ao pé da torre de Friol e outra na de San Paio.
Con esta II Camiñada iniciamos xa en serio o proxecto interdisciplinar ao que este ano incorporamos unha nova actividade relacionada coa microtoponima da que daremos conta no seu momento.
Boa andaina!

I Camiñada das Torres. ( I )

Hoxe pola mañá, tal e como estaba previsto fixemos o percorrido queune a torre de Friol coa de San Paio. Tardamos algo máis do previsto no primeiro treito da actividade o que significou ter que reducir o tempo destinado á visita do museo Etnográfico de S. Paio.

Ao rematar a camiñada o cansazo reflectíase na cara dos participantes, pero ou moito me equivoco, en xeral os alumnos e alumnas participantes quedaron contentos coa mesma.
Aínda queda a fase de avaliación da mesma que non puidemos facer por ter que entrar no comedor--fóra de hora--. Farémola o luns nas clases de Lingua Galega.
Agora co traballo feito empezaremos a publicar entradas relacionadas coa Camiñada e coas cousas que quedaron pendentes por rematar e que como traballo engadido levan algúns dos grupos do proxecto Interdisciplinar.
Por certo: Previamente á publicación de calquera entrada, o contido da mesma debe ser revisado, tanto nos contidos como na forma e para iso explicaremos na clase como facer esta revisión previa.
Creo que estamos ilusionados e desexosos de publicar pero as cousas hainas que facer con xeito. Seguro que estades de acordo comigo.